Ugolino van Monte Giorgio skryf dat versoekings ons nie moet bangmaak nie. Dit is meer as wat ek kan sê.  Versoekings en beproewings is iets wat ons oor die algemeen wil vermy. Ons ken onsself immers so goed. Ons is swak. Ons is gewoon bang dat versoekings en beproewings die oorhand oor ons sal kry. 

Ugolino van Monte Giorgio se argument is egter ietwat anders. Hy skryf: Moenie bang wees dat jy versoek word nie, want hoe meer jy deur versoekings aangeval word, hoe meer beskou ek jou as ’n vriend en dienaar van God, en hoe meer liefde het ek vir jou. Laat ons vir geen oomblik dink Christene minder versoekings en beproewings as nie Christene moet deurgaan nie.  Een van die kerkvaders het opgemerk: hoe groter Christen, hoe groter die aanvegting. Die magte van die duisternis sal geen steen onaangeroer laat om ons van God te vervreem nie.  Die versoekings en beproewings wat ons deurgaan is heel dikwels die duiwel se manier om ons te oortuig dat God nie omgee nie.    

Daarom beskou Jakobus dit as ’n rede tot blydskap wanneer ons deur beproewings gaan. Dit is juis iets wat ons tot groter afhanklikheid van God lei. Ons tekort is God se geleentheid om ons met wysheid, volharing en krag te vul. Dit is juis die dorings in ons vlees wat ons laat besef dat God se genade genoeg is (2 Kor 12:12). 

Is jy God se vriend?  Het jy Hom lief? Versoekings sal nie minder word nie. Beproewings is deel van ons lewe. Laat ons in afhanklikheid van God om wysheid bid wanneer ons dit beleef.

Here, maak ons meer afhanklik van U deur versoekings en beproewings, in Jesus se Naam. Amen.